قلوب رقيقة .. !!

السلام عليكم ورحمة الله 

النهاردة وانا عالفيس بوك .. وكنت بتفرج كالعادة على البوستات 

والكومنتات والبيدجات والجروبات .. لفت نظرى فيديو غرييب جدااا 

أنا عموما مش من هواة الفرجة على الفيديوهات 

ولكن شدنى اسم الفيديو ده ( أقسم بالله انى لم ارى مثل هذا )

فقلت اية ده ؟؟ مين اللى يقسم كده الا اذا كانت حاجة غريبة فعلا 

المهم .. فتحت الفيديو وقلت اشووف اية الموضوع
وفعلا كان من اغرب الحاجات اللى شفتها فى حياتى 

الفيديو كان عبارة عن مجموعة من المشاعر الصادقة جداا 

والحنونة جدااا .. واللى كنت بجد اتمنى انى اشوفها من بشر 

ولكن سبحاان الله اللى شفته كان من فعل الحيوان اللى احنا 

بنقول انه مبيفهمش ولكن اللى شفته شيء مبهر فعلا 

شىء ممكن الانسان نفسه يعجز عن فعله .. ولكن سبحاان الله 

كان فى اصرار غريب من الحيوان ده لأنقاذ حيوان اخر زيه 

وبطريقة طبية كمان ...!!!

متستغربوش دا اللى حصل فعلا .. وسبحان الله العظيم فعلا 

بس الظاهر ان ربنا مكتبش للحيوان التانى انه يعيش 

رغم تدخل من طبيب بيطرى لمحاولة انقاذه بعد طبعا ما انبهر بمحاولة الحيوان 

فى انقاذه .. ولكن كان مفيش امل .. ناهيك باة عن الموسيقى الحزينة 

اللى فى الفيديو ده واللى تحسسك بحزن الحيوان ده فعلا واد اية كان 

بيحاول بأستماته انه يرجع الحيوان التانى للحياة 

...

يمكن ناس تستغرب وتقول اية الهبل ده ؟؟
هو عمال بيكتب فى اييية ؟؟ وبيقول اييية ؟؟ وحيوان ايية والناس بتموت محدش بيسأل عنها ؟؟

لكن بصراحة انا اللى خلانى اكتب عن حاجة زى دى .. أن الغرب نفسهم 

بيستنوا اللحظات اللى زى دى والاحاسيس دى عشان ينقلوها
فى افلام الانيميشن ويعلموا اطفالهم منها .. فى الوقت اللى ممكن احنا 

نشوفها ولكن ولا نهتم حتى .!!
وليه ؟؟ لأن فى قلوب كتييييير جدا لا يوجد فيها رحمة حتى بين الناس وبعضها 

فما بالكم برحمة الانسان بالحيوان .. واللى أسلامنا العظيم وقرها 

واهتم بها .. والمثال السيدة التى كانت زانية .. ومرت ببئر
فشربت منه .. ثم جاء كلب يلهث ويأكل الثرى من العطش
فعادت للبئر فملأت خفها لتسقيه .. فغفر الله لها
وقد كانت زانية .. فسبحان الله العظيم 

......

فى النهاية اللى عاوز اقوله اننا نخلى فى قلوبنا رحمة ومنفتريش 

ومنستهونش حتى بصغائر الامور اللى ممكن تكون سبب فى دخولنا الجنة .. او والعياذ بالله فى دخول النار .. وحتى لو لم تكن كذلك فكفانا
قسوة وظلم وتحجر فى القلوب .. ولنسأل الله أن يرقق قلوبنا جميعا
ويجعلنا من المؤمنين .. رحماء بالناس وببعضنا البعض
فذلك اقرب للتقوى .. 

والان اترككم مع الفيديو المؤثر 

واتمنى ان نشاهده بتدبر وغير سخرية 

ولنفهم المعنى منه .. وشكرا

(بقلمى)